Son yenilənmə tarixi 15/09/2023 by Leyla Xanım
Ərzaqlar:
20 pirojna üçün
Xəmir üçün:
1 stəkan xama
çay sodası (çay qaşığının 1/4 ‘i)
200 qram kərə yağı – əridib soyudun
2 stəkan əla növ ağ un
İçi üçün:
2 stəkan kəsmik
1 stəkan şəkər
yarım stəkan un
bir çimdik vanil
Üstü üçün – şəkər kirşanı (pudrası)
Hazırlanması:
Əvvəlcə xəmiri düzəldin. Bunun üçün bir qabda sodanı xamada qabardın. Üstünə yağ və unu əlavə edib xəmir yoğurun. Xəmir zərif olmalı və çox bərk olmalalıdır. Xəmiri kündələyib 2 saat ərsində soyuducuda saxlayın.
İçi hazırlayın. Bunun üçün bir qabda kəsmik, şəkər, un və vanili qarışdırın. Alınan kütləni 1 saat ərzində soyuducuda saxlayın. Diqqət – əgər kəsmik çox suludursa, onu tənzifə qoyub suyunu süzün. Əks halda iç sulu olacaq.
Sobanı 190C-dək qızdırın.
Xəmiri qozdan bir qədər böyük parçalara ayırıb kündələyin. Hər kündəni oxlovla diyametri 5 santimetrə olan dairələr şəklində açın. Dairənin bir tərəfinə təxminən bir xörək qaşığı içdən qoyub dairəni şəkildə gördüyünüz kimi bükün. Sonra pirojnalara banan şəkli verib tikişləri aşağıda olmaq şərtilə listə aralı-aralı düzün.
Təxminən 20-25 dəqiqə bişirin. Hazır pirojnaların altı bir qədər qızarmış olmalı, üstü isə ağ qalmalıdır. Pirojnalar tamamilə soyuduqdan sonra üstlərinə şəkər kirşanı ələyin. Nuş Olsun!
Azcookbook