Son yenilənmə tarixi 21/10/2023 by Leyla Xanım
Ərzaqlar:
1 kq gilənar
1 kq şəkər tozu
150 ml su
Bu ölçüləri artıtabilərsiniz.
Hazırlanması:
Gilənarın saplağını təmizləyib yuyun. Aşsüzənə yığın.
Sirop hazırlamaq üçün şəkər tozunu ləyənə töküb üzərinə su əlavə edin. Şəkər tozu tam əriyənədək vam odda bişirin.
Meyvəni qaynar siropa tökün, qarışdırıb 6-8 saat saxlayın.
Sonra ocağın üstünə qoyun. Qaynara düşəndən sonra 10 dəqiqə qaynadın, söndürün. Sonra daha 6-8 saat saxlayıb, yenə 10 dəqiqə qaynadın.
Gilənar mürəbbəsini yığdığınız bankaları sterilizə etmək vacibdir. Bunun üçün iri qazana su töküb qapaqları və ağzıaçıq bankaları üzüaşağı içinə qoyaraq təxminən 15-20 dəqiqə qaynadın.
Hazır mürəbbəni sterilizə edilmiş bankalara yığıb qapaqlarını bağlayın, bankaları tərs çevirin. Soyuyanda düzəldin.
Su ilə bişirilən zaman mürəbbənin rəngi biraz tünd olur.
milli.az
Susuz bişirmək üçün;
1kq albalı üzərinə 1kq şəkər tozu tökülüb 3-4 saat saxlanır. Albalı su buraxdıqdan sonra odun üzərinə qoyulub vamla bişirilir.